Një 20-vjeçar i identifikuar si Xhuljan Rrethaj është arrestuar nga policia në Shkodër, pasi dyshohet se ka kryer disa vjedhje në bashkëpunim me një të mitur.
Sipas Policisë, të dyshuarit kanë vjedhur në raste të ndryshme motomjete, një biçikletë elektrike, një celular dhe një shumë parash në një lokal, në Shkodër dhe Velipojë. Gjatë operacionit të koduar “Recently”, policia ka sekuestruar dy motomjete të dyshuara të vjedhura, të cilat dyshohet se janë përdorur në aktivitetin kriminal.
Ndërkohë, gjatë kontrollit në banesën e 20-vjeçarit u gjet edhe një sasi e dyshuar lënde narkotike Cannabis sativa. Hetimet vijojnë për të zbardhur raste të tjera vjedhjeje, ku mund të jetë përfshirë i arrestuari.
Njoftimi i policisë:
Shërbimet e Komisariatit të Policisë Shkodër, si rezultat i veprimeve hetimore për zbardhjen e rasteve të vjedhjes, identifikimin dhe kapjen e autorëve, finalizuan operacionin policor të koduar “Recently”, gjatë të cilit u kap dhe u vu në pranga shtetasi:
Xh. Rr., 20 vjeç, banues në fshatin Grudë e Re, Shkodër.
Nga veprimet hetimore dyshohet se 20-vjeçari, në bashkëpunim me një shtetas të mitur, në periudha të ndryshme, në qytetin e Shkodrës dhe në Velipojë, ka kryer disa raste vjedhjeje, konkretisht motomjete, një biçikletë elektrike, një celular dhe një shumë parash në një lokal.
Motomjetet janë gjetur dhe sekuestruar në cilësinë e provës materiale.
Gjatë kontrollit në banesën e 20-vjeçarit, shërbimet e Policisë gjetën dhe sekuestruan, në cilësinë e provës materiale, një sasi lënde të dyshuar narkotike Cannabis sativa.
Vijojnë hetimet për zbardhjen e vjedhjeve të tjera që mund të ketë kryer i arrestuari.
Materialet procedurale iu referuan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
