Një sistem kamerash inteligjente do të vendosë nën monitorim 20 shkolla të Tiranës dhe Kamzës. Projekti pilot “Smart City” synon të evidentojë në kohë reale rreziqet brenda dhe përreth institucioneve arsimore.
Sipas ministres së arsimit, Mirela Kumbaro, kamerat do të jenë mjet ndihmës dhe nuk duhet të zëvendësojnë plotësisht vëmendjen e mësuesve, drejtuesve dhe punonjësve të sigurisë.
“Çdo fëmijë që nuk është në shkollë është një rrezik potencial për veten, familjen dhe shoqërinë. Kamerat dedektojnë në kohë reale një tym cigareje, dedektojnë çdo objekt që është futur në katalog si i dyshimtë dhe i rrezikshëm. Nëse dikush, një person i huaj, ka ardhur, ka krijuar probleme dhe ju e keni raportuar si problematik, nëse ai rikthehet, kamera e dedekton që në momentin kur ai afrohet”, tha Kumbaro.
Një tjetër rregull që rikthehet në shkolla është ndalimi i telefonave celularë gjatë mësimit.
“I rikthehemi të njëjtit rregull në mënyrë taksative. Do të thotë që edhe mësuesi, në 45 minutëshin e orës, duhet ta ketë harruar që është pronar i një celulari”, shtoi Kumbaro.
Në fokus do të jetë edhe respektimi i Kodit të Etikës dhe mënyra e komunikimit me nxënësit. Për herë të parë, dita e parë e shkollës do t’i kushtohet njohjes së nxënësve me mësuesit, mjediset, shokët e klasës dhe rregullat.
