Mbrëmja e qetë e së hënës u prish në Torino. Presidenti i Juventusit, Andrea Anjeli, dhe komplet bordi drejtues i “zonjës së vjetër” duke filluar nga Pavel Nedved dhe Maurizio Arrivabene dhanë dorëheqjen. Lajmi surprizë u bë publik të hënën vonë pas një mbledhje të fundit të kryesisë së klubit bardhezi.

 

 

Presidenti Anjeli në një letër të hapur tha se vendimi ishte për të mirën e klubit pasi aksionerët nuk po arrinin të gjenin gjuhën e përbashkët për investim. Shenja e fundit se diçka e madhe po ndodhte ishte shtyrja e dytë e mbledhjes së aksionerëve, e komunikuar rreth një javë më parë, e cila u shty nga fundi i tetorit në fund të nëntorit dhe më pas për në 27 dhjetor. Vendimi u argumentua si nevoje për të zbatuar gjetjet e bëra nga organi i kontrollit të Bursës lidhur me pasqyrat më të fundit financiare, ato të viteve 2021-22. Prokurori Publik i Torinos nisi një hetim mbi klubin për pasqyrim të pasaktë të financave.

 

 

Një tjetër hetim lidhej me akuzat për komunikime të rreme, pengesa për ushtrimin e organeve mbikëqyrëse, mashtrime me informacionin dhe faturimet e rreme për transaksione inekzistente. Pjesë e këtij hetimi është vet Angjeli, Nedved, Arrivabene si dhe 15 persona të tjerë. Vendimi për dorëheqjen sipas mediave italiane është marrë nga frika e rikthimit të ligjit 231, i cili parashikon parimin e përgjegjësisë administrative për lloje të veçanta krimesh të kryera nga drejtorët dhe punonjësit e kompanive, i cili përveç sanksioneve parashikon që përgjegjësia penale mund të çojë edhe në frenim operimi të aktivitet të klubit.

 

 

Agnelli ka përshëndetur punonjësit me një letër ku thekson arritjet e jashtëzakonshme si Stadiumi i ri, 9 kampionate radhazi për meshkuj dhe 5 për femra dhe 2 finale Championsi. Epokës së familjes Anjeli në krye të klubit bardh e zi duket se i ka ardhur fundi.

Leave a Reply

Your email address will not be published. Required fields are marked *