20 shtetas që vijnë nga vende në konflikt të Lindjes së Mesme janë kapur nga policia kufitare dhe Frontex në tentativë për të hyrë në vendin tonë përmes kufirit të gjelbërt.
Burime pranë Drejtorisë së Kufirit dhe Migracionit bëjnë me dije se bëhet fjalë për shtetas afganë, kurdë, marokenë dhe algjerianë pjesa më e madhe e të cilëve pasi janë marrë në pyetje i janë dorëzuar policisë greke për t’i kthyer në kampet e azilantëve në vendin fqinj.
Gjatë ditëve të fundit ka një tendencë në ritje të kalimit të shtetasve të huaj nëpërmjet vijës së gjelbër nga shteti fqinj në vendin tonë. Pjesa më e madhe e tyre janë kapur nga policia jonë kufitare dhe Frontex, të cilët janë rikthyer nga kishin ardhur ndërsa pjesa tjetër janë dërguar në stacionin kufitar në Kapshticë ku dhe janë intervistuar nga ana e policisë.
Një pjesë e tyre kryesisht familjarë janë dërguar në qendrën e azilkërkuesve në Babrru, ndërsa pjersa tjetër në shtetin grek.
Gjatë këtyre ditëve në tre-katër raste nga ana e policisë së qarkut Korçë janë arrestuar shtetas shqiptarë të cilët po transportonin me mjetet e tyre refugjatë të paligjshëm.
