Partia Socialiste festoi sot në “Sheshin Italia” 35-vjetorin e themelimit, ku morën pjesë themelues, anëtarë dhe simpatizantë.
Në fjalën e tij, kryetari i PS-së, Edi Rama, theksoi se ai ndihet krenar për atë që socialistët kanë arritur.
Kryesocialisti tha se sot ndihet më krenar se kurrë, sepse që prej ardhjes në pushtet të socialistëve nuk ka asnjë pëllëmbë tokë të Shqipërisë në shitje dhe se flamuri i Ismail Qemalit valëvitet me krenari.
Ai kujtoi gjithashtu liderin historik të PS-së, Fatos Nano, i ndarë nga jeta pak kohë më parë, si dhe të gjithë ata që kanë kontribuar ndër vite për Partinë Socialiste.
Ndërsa shtoi se PS-ja nuk do të ndalet derisa ta çojë Shqipërinë në majën ku i takon, në Bashkimin Evropian.
“Qysh se PS-ja ka marrë drejtimin e Shqipërisë dhe rrugën drejt Bashkimit Evropian, ky vend nuk është kurrë për shitje. Flamuri i ngritur në Vlorë nga Plaku i Pavarësisë nuk është më një çarçaf, por për ne, për mua, Shqipëria është një amanet i shenjtë në sytë, në mendjen dhe në zemrën time.
Prandaj jam krenar sot në këtë përvjetor përballë të gjithëve ju, qoftë përballë atyre që më besuan, qoftë përballë atyre që ishin në të drejtën e tyre të mos më besonin, dhe qoftë përballë atyre që kishin të drejtën të më luftonin.
Jam krenar edhe përballë atyre që nuk janë sot, ku dua të veçoj liderin historik, Fatos Nano. Krenaria e tij për t’u shprehur publikisht në vitet e fundit të jetës së tij, edhe pasi marrëdhënia jonë kaloi në faza dramatike, mbetet për mua një vlerësim i veçantë.
Ashtu siç më shkon mendja për veteranët e luftës, edhe pse nuk janë më me ne. Nuk krenohem përpara jush e çdo anëtari të familjes sonë se kam bërë gjithçka mirë apo se nuk i kam hyrë në hak askujt. Jo, nuk e kam bërë çdo gjë mirë. Kam gabuar jo njëherë dhe, edhe pse kurrë nuk kam dashur t’i hyj në hak askujt, ka shumë të ngjarë ta kem bërë pa qëllim.
Krenohem se i kam dhënë dhe do t’i jap PS-së gjithçka që kërkohet nga një lider. Së bashku me PS-në, ia kemi ngritur kokën Shqipërisë dhe çdo shqiptari, që sot e thotë pa siklet: jam shqiptar dhe jam krenar. Sepse ne dhe askush tjetër do ta çojmë Shqipërinë në majën ku dielli lind andej nga perëndon”, tha Rama.
