Zyrtarët turq, jordanezë dhe irakenë thanë të dielën se Irani i kishte njoftuar disa ditë përpara sulmit të tij me dron dhe raketa ndaj Izraelit, por zyrtarët amerikanë theksuan se ata nuk ishin vënë në dijeni për diçka të tillë dhe kjo ishte bërë me qëllim shkaktimin e një dëmi të madh.
Irani lëshoi qindra dronë dhe raketa të shtunën në një sulm hakmarrës pas një sulmi të dyshuar izraelit në kompleksin e ambasadës së tij në Siri.
Lexo edhe :
Shumica e dronëve dhe raketave u rrëzuan përpara se të arrinin në territorin izraelit, megjithëse një vajzë e re u plagos rëndë, ndërkohë që rajoni i trembet një përshkallëzimi të madh.
Ministri i Jashtëm iranian Hossein Amirabdollahian tha të dielën se Irani u tha vendeve fqinje dhe aleatit të Izraelit, Shteteve të Bashkuara se do të niste sulmin 72 orë para se të ndodhte.
Ministria e Jashtme e Turqisë tha sipas Reuters, se kishte komunikuar me Uashingtonin dhe Teheranin përpara sulmit, duke shtuar se kishte përcjellë mesazhe si ndërmjetës për t’u siguruar që reagimet të ishin proporcionale.
“Irani tha se reagimi do të ishte një përgjigje ndaj sulmit të Izraelit ndaj ambasadës së tij në Damask dhe se nuk do të shkonte përtej kësaj. Ne ishim të vetëdijshëm. Zhvillimet nuk ishin befasi,” tha një burim diplomatik turk.
Por, një zyrtar i lartë në administratën e presidentit amerikan Joe Biden mohoi deklaratën e Amirabdollahian, duke thënë se Uashingtoni kishte kontakte me Iranin përmes ndërmjetësve zvicerjanë, por nuk mori njoftim 72 orë përpara.
“Kjo nuk është absolutisht e vërtetë,” tha zyrtari. “Ata nuk dhanë një njoftim.
Teherani i dërgoi një mesazh Shteteve të Bashkuara vetëm pasi filluan sulmet dhe qëllimi ishte të ishte të shkaktonte sa më shumë dëm”, tha zyrtari. /vizionplus.tv
