Për shkak të koronavirusit, më shumë njerëz kanë kryer skaner të mushkërive. Kjo ka ndihmuar në zbulimin e kancerit të mushkërive në faza të hershme, tha kirurgu rus, Igor Khatkov.
Ai shpjegoi se normalisht njerëzit hezitojnë të shkojnë për kontroll mjekësor, por pandemia e ndryshoi këtë. Gjatë skanerit që kryhet për infeksionin, mjekët identifikojnë edhe raste të rritjes së qelizave kanceroze në mushkëri, u shpreh kirurgu rus.
“Një nga problemet më të mëdha është se njerëzit nuk duan të vizitohen. Kur janë të shëndetshëm, ata injorojnë rekomandimet për kontrolle të rregullta. Nëse ata fillojnë të ndihen jo mirë, ata zakonisht i injorojnë simptomat dhe kërkojnë ndihmë mjekësore vetëm kur dhimbja dhe vuajtja bëhen të padurueshme”, deklaroi ai.
