Në Drejtorinë Vendore të Policisë Shkodër pritet të ketë ndryshime, ku drejtori aktual, Gentian Berberi, do të largohet nga detyra pas rreth 11 muajsh në krye të uniformave blu në këtë qark.
Burime nga Policia e Shtetit bëjnë të ditur se në vend të tij pritet të emërohet Dashamir Spaho.
Spaho është një emër i njohur për strukturat e policisë në Shkodër, pasi më herët ka mbajtur detyrën e zv/drejtorit të Drejtorisë Vendore të Policisë në këtë qark.
Së fundmi, ai ka qenë i angazhuar në Departamentin për Kufirin dhe Migracionin në Drejtorinë e Përgjithshme të Policisë së Shtetit.
Lëvizja në drejtimin e policisë vjen në një periudhë të ngarkuar për strukturat e rendit, në prag të sezonit turistik, kur prania e forcave të policisë në zonat bregdetare dhe turistike shtohet ndjeshëm.
Pak ditë më parë, në Policinë e Shkodrës u regjistrua edhe një tjetër ndryshim, pas pezullimit të shefit të Komisariatit, Bekim Lika, lidhur me një parcelë me kanabis të zbuluar në Velipojë. Në vend të tij u emërua Erjon Dume.
Gentian Berberi kishte marrë drejtimin e Policisë së Shkodrës rreth 11 muaj më parë, duke zëvendësuar Fatmir Lleshin. Ende nuk është bërë e ditur detyra e tij e re pas largimit nga ky post.
