Shqipëria i është përgjigjur thirrjes së Shteteve të Bashkuara të Amerikës për të kundërshtuar bashkëpunimin me kompaninë kineze Huawei dhe rrjetin e saj 5G. Vetëm një ditë më parë qeveria njoftoi miratimin e memorandumit të mirëkuptimit me Shtetet e Bashkuara për sigurinë 4 dhe 5G.
Ky hap u ndërmor pas propozimit të ministrit të infrastrukturës dhe energjisë. Ambasada Amerikane në mënyrë të vazhdueshme ka shprehur shqetësimin që asnjë shtet ne botë të mos lidhë marrëveshje me kompaninë kineze Huawei. SHBA-ja dyshon se kjo kompani bashkëpunon me qeverinë kineze dhe cenon sigurinë e të dhënave personale të përdoruesve të saj.
Ndaj selia diplomatike amerikane ka theksuar se “siguria nuk mund të komprometohet apo të shitet”. Por kompania Huawei me qendër në Kinë i ka mohuar vazhdimisht akuzat e Uashingtonit.
