Prokuroria e Posaçme kundër Korrupsionit dhe Krimit të Organizuar (SPAK) ka përfunduar hetimet ndaj një shtetasi rus, i akuzuar për kërcënim me shpërthim bombe në Aeroportin e Rinasit.
Sipas njoftimit zyrtar, Vladislav Urban, 44 vjeç, është marrë i pandehur për veprën penale “kanosje për kryerjen e veprave me qëllime terroriste”.
Nga hetimet rezulton se në muajin shkurt 2023, Urban ka dërguar një email në adresën e Shefit Operacional të aeroportit të Rinasit, ku kërcënonte me vendosjen e një bombe, nëse qeveria shqiptare nuk do të njihte Kosovën si pjesë të Serbisë. Në të njëjtin mesazh, ai pretendonte se kishte marrë peng edhe dy shtetas shqiptarë.
Pas verifikimeve dhe shkëmbimit të informacionit me autoritetet greke, u konstatua se kërcënimi ishte i rremë dhe se 44-vjeçari, rezident në Selanik, nuk kishte marrë asnjë person peng.
Hetimet zbuluan gjithashtu se Urban ka precedentë të mëparshëm për dërgimin e mesazheve kërcënuese.
Materialet procedurale i janë referuar gjykatës për vijimin e procesit ndaj tij.
/vizionplus.tv
