Kryeministri i Shqipërisë, Edi Rama, deklaroi në Konferencën Vjetore të Komisionit të Bllokut Lindor në Berlin se sulmet kibernetike dhe dezinformimi përbëjnë një nga sfidat më të mëdha me të cilat përballen sot demokracitë, duke sjellë si shembull edhe rastin e Shqipërisë.
Në fjalën e tij, Rama tha se vendi është përballur jo vetëm me sulme kibernetike, por edhe me fushata të organizuara dezinformimi, të cilat sipas tij kanë ndikuar në perceptimin publik për çështje të ndryshme.
“Sulmet kibernetike janë një problem madhor, me të cilin është përballur edhe Shqipëria. Kishte edhe dezinformata. U tha se do të ketë masakër mjedisore, u tha se ka korrupsion madhor, pa u provuar kjo gjë”, u shpreh kryeministri.
Duke iu referuar reagimeve të krijuara nga informacionet e pakonfirmuara, Rama theksoi se indinjata e nxitur nga dezinformimi ka prodhuar një numër të madh qytetarësh të pakënaqur, ndërsa nënvizoi se ky fenomen nuk është i kufizuar vetëm në Shqipëri.
“Indinjata nga dezinformimi krijoi mijëra të pakënaqur. Ky nuk është një fenomen vetëm shqiptar, por edhe europian e botëror. Por ata që bëjnë linçime digjitale, do të humbasin herët a vonë”, deklaroi Rama.
Konflikti kibernetik midis Shqipërisë dhe Iranit filloi në vitin 2022 kur hakerë të lidhur me shtetin iranian kryen sulme kibernetike ndaj sistemeve qeveritare, duke përfshirë portalin e-Albania. Si pasojë, Shqipëria ndërpreu marrëdhëniet diplomatike me Iranin në shtator të vitit 2022. Kërcënimet kanë vijuar me fushata të vazhdueshme dezinformimi dhe ndërhyrje hibride nga grupe si “Homeland Justice”, të cilat kanë vazhduar të shënjestrojnë institucionet shqiptare edhe gjatë vitit 2026.
