Partia Republikane do të dërgojë në Gjykatën Kushtetuese kërkesën për ndalimin e aktiviteteve dhe tubimeve politike.
Në reagim nënvizohet se pas kësaj fshihet një qëllim i padiskutueshëm politik dhe kërkohet që të mos krijohet mundësia e komunikimit të drejtpërdrejtë të qytetarëve me politikën, duke shtuar se rruga e vetme që ka opozita për t’u ndeshur me këtë regjim, është komunikimi me të gjithë qytetarët.
“Pas kësaj fshihet një qëllim i padiskutueshëm politik, kërkohet që përveç manipulimit ligjor, kushtetues që i është bërë Kodit Zgjedhor, interferimit të grupeve korruptive dhe kriminale, qartësisht kërkohet që të mos krijohet mundësia e komunikimit të drejtpërdrejtë të qytetarëve me politikën, për të ndërtuar një marrëdhënie, sepse rruga e vetme që ka opozita për t`u ndeshur me këtë regjim, është komunikimi në çdo skaj të Shqipërisë, me të gjithë qytetarët, për t`i dëgjuar dhe komunikuar me ta, për të ndërtuar një raport shprese dhe besimi, dhe për të bërë të mundur ndryshimin e këtij realiteti, që është i papranueshëm, si nga BE dhe nga të gjitha institucionet financiare ndërkombëtare. Prandaj mendoj që kjo është shumë e rëndësishme që ne t`a çojmë në Gjykatën Kushtetuese. Kushtetuta duhet t`i garantojë liritë dhe të drejtat e qytetarëve edhe në momentin e cënimit, në rastet emergjente dhe se duhet të ketë një ndërhyrje në mënyrë proporcionale.”
