Policia e Shtetit i ka krehur mirë drejtuesit e makinave në mbarë vendin.
Shifrat e fundit të bëra publike nga policia bëjnë me dije se në 48 orët e fundit në të gjithë vendin janë arrestuar 31 drejtues mjetesh, 16 vetëm në Tiranë.
Po ashtu 186 patenta janë pezulluar ndërsa janë vendosur 4 624 masa administrative për shkelje të ndryshme të Kodit Rrugor.
Operacion “Tispol”, bëri që të zhvilloheshin kontrolle të organizuara në të gjithë vendin, duke përdorur mjetet speciale për kontroll, si dragera e radarë.
Policia shton se kontrollet të përqëndruara në të gjitha rrugët me risk patën si objektiv kontrollin dhe ndëshkimin e drejtuesve të mjeteve, të cilët drejtojnë mjetet nën efektin e alkoolit apo të papajisur me leje drejtimi, si dhe për mjetet që ecin me shpejtësi tej normave të lejuara apo bëjnë gara shpejtësie.
Kontroll me shërbime të kombinuara është ushtruar edhe për evidentimin dhe ndëshkimin e drejtuesve të automjeteve që përdorin celularin gjatë drejtimit të automjeteve, e atyre që nuk përdorin rripin e sigurimit apo kaskën mbrojtëse, si dhe atyre që kryejnë parakalime të gabuara dhe manovra të rrezikshme në rrugë.Gjatë 48 orëve që u zhvillua operacioni “Tispol”, në të gjithë vendin u arrestuan 31 drejtues mjetesh, nga këta 18 për drejtim mjeti në gjendje të dehur dhe 13 për drejtim mjeti pa leje drejtimi.Duke përdorur aparatet drager gjatë 48 orëve janë evidentuar dhe u është pezulluar leja e drejtimit 74 drejtuesve të mjeteve, të cilët drejtonin mjetin nën efektin e alkoolit.Gjithashtu nga kontrollet parandaluese, u konstatuan me radar 76 drejtues mjetesh, të cilët qarkullonin me shpejtësi që varionte nga 140 km/h deri në 174 km/h.Jane pezulluar dhe dërguar në OASH edhe 36 drejtues mjetesh, për shkelje të tjera që parashikohen nga Kodi Rrugor, me masë ndëshkimi pezullim patente.Janë vendosur 646 masa për përdorim celulari gjatë drejtimit të mjetit, të cilat evidentuar nga shërbimet e kombinuara me punonjës policie civilë.321 masa për mospërdorim të rripit të sigurimit, 578 për parakalime të gabuara, 87 për mosvendosje të kaskës mbrojtës, 11 për gara shpejtësie, ndërsa pjesa tjetër prej 2 981 masash administrative janë vendosur për parkime të gabuara e shkelje të tjera.
Policia Rrugore paralajmeroi se gjatë javës do vijojnë kontrollet, për mjetet e transportit publik (kryesisht për nxënësit) dhe linjave urbane e interurbane.
