Seanca e sotme parlamentare në Kosovë u shoqërua me debate e përplasje fizike mes deputetëve. Këtë të enjte po diskutohej për të pagjeturit, por deputeti i LDK, Arben Gashi akuzoi Lëvizjen Vetëvendosje se po politizon çështjen e të pagjeturve për interesa politike.
“Kjo është një temë jashtëzakonisht e ndjeshme dhe trajtimi i saj mbi idenë e politizimit është vetëm edhe një hap tjetër drejt turpit të përbashkët të përdorimit për interesa ditore politike të një çështje kaq të dhimbshme nacionale. Personat e pagjetur dhe fati i tyre, dhimbja e familjeve dhe shoqërisë kosovare të përdoret për interesa politike me argumente të paqena është një turp i madh. Personat e pagjetur po trajtohen këtu nga një këndvështrim i gabuar, për personat e pagjetur ka vetëm një fajtor, është shteti i Serbisë, jo regjimi i Millosheviqit, por shteti i Serbisë, sepse ato vrasje, ato zhdukje janë kryer nga shteti i Serbisë”, tha ai.
Deputetja e LVV, Mimoza Kusari e mohoi një akuzë të tillë.
“Edhe z. Gashi përmendi të pavërteta, pafytyrësisht nga kjo foltore gënjeu”.
Pas kësaj fjalën e mori deputetja Saranda Bogujevci, e cila sulmoi Gashin.
“Dallon ajo çka ti the që ka të bëjë me të zhvendosurit në atë me atë çka shkruan në dokument. Mos ma përmend familjen ti ski drejt, rri qaty ulu…”
Arben Gashi u sulmua edhe nga nënkryetarja e Kuvendit, Arbërie Nagavci.
“Mëshoj tavolinës, ndalo mos bërtit”, ju drejtua ajo deputetit të LDK.
Seanca u ndërpre disa herë për shkak të tensioneve e debateve.
