Shqipëria merr bashkë me Maqedoninë vendimin për hapjen e negociatave të anëtarësimit në qershor 2019. Pas një debati maratonë në Luksemburg, ministrat e jashtëm të vendeve anëtarë i thanë po nisjes së bisedimeve, duke vënë njëkohësisht dhe kushte për dy vendet.
Komisioneri për zgjerimin Johanes Han shprehu i pari gëzimin për këtë arritje, duke shkruar në twitter se ky ishte një sinjal i qartë për rajonin qe reformat shpërblehen.
Në dokumentin e këshillit të çështjeve të përgjithshme, vlerësohen arritjet e bëra në Shqipëri.
Duke pasur parasysh progresin e mësipërm, në veçanti për pesë prioritetet kyçe, Këshilli pajtohet që t’i përgjigjet pozitivisht progresit të mësipërm të bërë nga Shqipëria dhe përcakton rrugën drejt hapjes së negociatave për anëtarësim në qershor të vitit 2019.
Këshilli nënvizon nevojën kritike që Shqipëria të konsolidojë më tej progresin e bërë në reformën gjyqësore në veçanti përmes verifikimit dhe të japë rezultate të tjera të prekshme në luftën kundër korrupsionit në të gjitha nivelet dhe në luftën kundër krimit të organizuar, veçanërisht në kultivimin dhe trafikimin e drogës, ruajtjen dhe thellimin e momentit aktual të reformës.
Kjo përfshin avancimin e Vettingut, ngritjen e Strukturës Speciale Kundër Korrupsionit dhe Krimit të Organizuar dhe Byrosë Kombëtare të Hetimeve si dhe forcimin e procesit të hetimeve proaktive, ndjekjeve penale dhe dënimeve përfundimtare në luftën kundër korrupsionit dhe krimit të organizuar, duke përfshirë edhe nivele të larta.
Për këtë qëllim, Këshilli i bën thirrje Komisionit që të vëzhgojë nga afër përpjekjet e mësipërme të reformës nga Shqipëria dhe do të vlerësojë progresin në bazë të raportit vjetor të Komisionit.
Këshilli kujton që vendimi për të hapur negociatat e pranimit me Shqipërinë do t’i nënshtrohet përfundimit të procedurave parlamentare kombëtare dhe miratimit nga Këshilli Evropian dhe do të pasohet nga Konferenca e parë ndërqeveritare deri në fund të vitit 2019, në varësi të progresit të bërë. Këshilli thekson që ky vlerësim i progresit duhet të përfshijë rezultate të tjera të prekshme dhe të qëndrueshme duke u përqendruar në veçanti në sundimin e ligjit.
Këshilli i kushton një rëndësi të veçantë edhe zgjedhjeve si dhe zvogëlimit të numrit të azilkërkuesve dhe gjithashtu i kërkon Komisionit të sigurojë që kjo të merret parasysh.
Nevojën për progres e vuri në dukje edhe ministrja e jashtme bullgare Ekaterina Zaharieva, vendi i së cilës mban presidencën e BE-se.
Arritja e një vendimi nuk ishte e lehtë. Të gjithë po shpresonin diçka. Të arrinim një marrëveshje mes një debati të gjatë në të mirë të dy vendeve, ishte më mirë se asgjë. Kjo është hera e parë që Shqipëria merr një rekomandim nga komisioni. Ky është raporti i parë për marrjen e propozimit për hapjen e negociatave që nga marrja e statusit te vendit kandidat. Pavarësisht se është vendosur në 2019 data për fillimin e procesit, dy qeveritë, e Shqipërisë dhe Maqedonisë, duhet të vazhdojnë në implementimin e reformave.
Tre vendet që shfaqën më shumë kundërshti në mbledhjen e ministrave të jashtëm ishin Franca, Holanda dhe Danimarka. Ndërsa Gjermani deklaroi që në fillin votën e saj pro. Tashmë i takon Këshillit Evropian në samitin e 28 dhe 29 nëntorit që të zyrtarizojë vendimin e Luksemburgut.
