Është nderuar nga artistë, politikanë e të përndjekur politikë, regjisori Mihal Luarasi. Familjarët kanë pritur në Teatrin Kombëtar mesditën e kësaj të marte edhe dashamirës të artit të tij. Mihal Luarasi u nda nga jeta një ditë më parë, por do të kujtohet gjithnjë si regjisori i shumë çmimeve kombëtare me dramat e huaja, ato shqiptare, por edhe për kontributin që dha në opera.
Pavarësisht jetës së vështirë, dënimeve nga sistemi komunist dhe emigrimit, Mihal Luarasi nuk u shkëput asnjëherë nga teatri. Veprën e fundit e ngjiti në skenë dy vite më parë me emrat më të njohur të skenës teatrale. Mihal Luarasi është nderuar me çmimet “nder i kombit” dhe “artist i popullit”.
