Ministrja e Mbrojtjes, Olta Xhaçka, vizitoi kete te marte dy efektivët e kontigjentit EOD, të plagosur te henen nga shpërthimi i disa municioneve, gjatë kryerjes së detyrave luftarake, në misionin e NATO-s në Letoni.
Ministrja Xhaçka, u njoh nga afër me gjendjen e major Klodian Tanushit, i cili është i shtruar në Riga East University Hospital, ku ndodhet nën mbikqyrjen intensive të mjekëve.
Gjithashtu, ministrja Xhaçka vizitoi edhe Rreshter Juliaj Kapajn, i cili aktualisht ndodhet në spitalin e bazës ushtarake Camp Adazi në Letoni.
Gjendja e tij shëndetësore është shumë e mirë.
Në nderim të nëntetares Zarife Hasanaj, e cila u nda nga jeta gjatë misionit në Letoni do të organizohet një ceremoni shtetërore gjatë paradites së të premtes, më 10 maj 2019.
Trupi i efektives që humbi jetën një ditë më parë pritet të mbërrijë në Atdhe më datë 9 me avion ushtarak.
Për të shoqëruar trupin e efektives Zarife Hasanaj do të jenë edhe një efektiv kanadez, një letonez dhe kolegë të saj shqiptarë, pjesë të kontigjentit ku bënte pjesë.
Zarife Hasanaj do të pritet në aeroportin “Nënë Tereza”, me protokoll ushtarak e më pas trupi i saj do të dërgohet pranë familjes.
