“Vargjet e Lira” të Migjenit, tani mund t’i mbani me vete në celularin, lap topin, tabletën tuaj. Dhe nuk kushton asgjë, përveç 2 minutave përballë një pajisjeje që ka akses në internet. Biblioteka Kombëtare ua mundëson vargjet e lira të Migjenit, botuar në vitin 1944 në mënyrë digjitale. Mjafton të hyni në faqen zyrtare të bibliotekës, BKSH.AL. Në qendër është botimi i fundit i dixhitalizuar, vepra e Migjenit. E mjafton vetëm një klik për të hapur vëllimin e për ta pasur atë në pajisjen tuaj elektronike. “Vargjet e Lira” nga Migjeni janë projekti i tretë i dixhitalizuar në Bibliotekën Shqiptare, pasi më herët, ky institucion ka mundësuar për publikun veprën e plotë të Naim Frashërit dhe “Otellon” e Shekspirit. Në faqen kryesore BKSH.AL ne një nga kolonat në të majtë, ju fton të vizitoni gjithë Bibliotekën Dixhitale, ku nuk mungojnë hartat e vjetra, dorëshkrime, antikuarë dhe periodikë të ndarë në vite e numra të veçantë. Mjafton të klikoni nëse doni që ato të renditen sipas titujve, autorit apo vitit të botimit. Aktualisht, një grup në këtë institucion vijon punën për të ofruar për të gjithë shqiptarët më shumë lexime, pa kosto, pa u dashur të lëvizësh nga shtëpia për të kërkuar në arkiva, por vetëm me një klik nga kompjuteri a celulari.
“Migjeni” në celularin tuaj
