Mësuesit francezë po mbajnë një nga grevat më të mëdha arsimore në vitet e fundit, në shenjë proteste ndaj asaj që ata e quajnë, strategji e gabuar e qeverisë për menaxhimin e pandemisë.
Qindra shkolla fillore dhe të mesme në të gjithë vendin janë detyruar të mbyllen këtë të enjte pasi mësuesit dhe stafi mbështetës i arsimit janë bashkuar në një marshim përmes qendrës së Parisit drejt ministrisë së arsimit.
Ata shprehen se janë trajtuar me përbuzje dhe janë informuar për ndryshimin e protokolleve të Covid në minutën e fundit. Rregullat e testimit për nxënësit kanë ndryshuar disa herë që nga fillimi i muajit janar, ndërsa fëmijët mbi gjashtë vjeç janë të detyruar të mbajnë maska.
Sindikatat e mësuesve akuzojnë qeverinë se po rrezikon fëmijët me qasjen e paorganizuar e cila nuk i mbron ata mjaftueshëm nga virusi, duke shtuar se mësuesit që mungojnë nuk po zëvendësohen.
Në një deklaratë të përbashkët nga 11 sindikata thuhet se: “Përgjegjësia i takon ministrit të arsimit dhe qeverisë në këtë situatë kaotike për shkak të protokolleve të papërshtatshme dhe mungesës së mjeteve të duhura për të garantuar funksionimin e shkollave”.
