Kryetari i Partisë Demokratike Berisha ka akuzuar kryeministrin Edi Rama se ka udhëtuar më paratë e buxhetit të shtetit për vizita private, duke përdorur edhe avion charter.
Në një konferencë me gazetarët Berisha vuri në dukje se prej vitesh opozita kërkon komision hetimor për udhëtimet e kryeministrit dhe kjo kërkesë është rrëzuar nga socialistët, pikërisht pasi sipas tij Edi Rama kërkon të fshehë koston e udhëtimeve të tij për buxhetin e shtetit.
“Unë i them se ti je një mashtrues jo dy metra i gjatë, por dy kilometra i gjatë. Dhe në qoftë se ta mban, hajde lejo të krijojmë komisionin të analizojmë 140 udhëtime me Ismailin në dispozicion, sa kenë qenë zyrtare dhe sa kanë qenë private dhe familjare”, tha Berisha.
E ndërsa akuzoi kryeministrin Rama për korrupsion, Berisha mbështeti edhe njëherë kërkesat e protestuesve për largimin e tij. Lideri i opozitës vuri në dukje se kushtetuta garanton mekanizmat për shkarkimin e Edi Ramës në parlament, duke garantuar se të gjitha votat e PD do të jenë pro shkarkimit të tij.
“Një zgjidhje tjetër paqësore siç e kërkojnë protestuesit, është largimi i të gjithë deputetëve socialistë që nuk janë të implikuar në krime dhe kjo i hap rrugën shkarkimit me mocion mosbesimi Edi Ramës. Kjo shkarkon në vend Edi Ramën dhe krijon në parlament një mundësi për plotësimin e të gjitha kërkesave, si të 5 kërkesave të tyre ashtu dhe të një liste tjetër me 20 kërkesa duke i analizuar një nga një ato”, u shpreh ai.
Në komunikimin me gazetarët Berisha komentoi edhe hetimin më të fundit të SPAK-ut për trafikun e lëndëve narkotike dhe pastrimin e parave në sektorin e ndërtimit, duke akuzuar prokurorin Dumani se fsheh emrin e përfaqësuesve të qeverisë të përfshirë në këtë çështje.
“Kam vlerësuar dhe vlerësoj hetimin e kësaj dosje, nxjerrjen e listës së biznesmenëve të implikuar në këtë dosje dhe të trafikantëve, por nuk pranoj kurrë dhe nuk pajtohem kurrë me fshehjen e qeveritarëve apo qeveritarit të pranishëm në takim”, deklaroi kryedemokrati.
Berisha deklaroi se anëtarët demokratë në Komisionin e Ligjeve do të kërkojnë seancë me SPAK-un vetëm për këtë çështje.
/vizionplus.tv
