Disa zona do të nisin të “marrin frymë” disi më lirisht në ditët në vijim. Kreu i qeverisë, Edi Rama renditi qarkun e Gjirokastrës, Dibrës, bashkitë e Sarandës, Konispolit dhe Himarës, Pogradec, Prrenjas dhe Librazhd ku mund të nisë lehtësimi i masave.
“Nuk do të hapet transporti nga njëri qytet në tjetrin për shumë ditë, por do të relaksohen zonat ku risku është i ulët. Qarku i Gjirokastrës, i Dibrës, bashkia e Divjakës, e Sarandës, Konispolit dhe Himarës do të kenë liri lëvizjeje më të shumtë. Po kështu edhe zona Pogradec, Prrenjas dhe Librazhd. Këto janë zona me risk të ulët dhe bashkë me ministren e Shëndetësisë e kemi diskutuar gjerësisht dhe jemi kuptuar mirë. Në këto zona do të mundësojmë që lëvizja fshat-qytet të jetë më e relaksuar, do të mundësojmë që lëvizja në këmbë të jetë më e relaksuar, do të mundësojmë që pensionistët të dalin me orar, por të tjerët në shtëpi. Prindërit me fëmijët mund të dalin, mund të dalin edhe të rinjtë, por jo më shumë se dy dhe që të ndalohen grumbullimet në parqe.”
Sipas Ramës, hapja duhet të shoqërohet edhe me një ndërgjegjësim të qytetarëve që të zbatojnë rregullat dhe distancën sepse situata mund të përmbyset shumë kollaj.
“Hapja patjetër që sjell jo vetëm një rrezikshmëri më të lartë për infektimin, por edhe mundësi që numrat të rriten. Kjo do të thotë që ne nuk mund të rrimë mbyllur derisa të dalë vaksina. Nuk mban më nëse rri kjo punë derisa të dalë vaksina. Duhet të garantojmë sjelljen, rregullat. Nuk është çështja e Kodit Penal, është çështja e kodit njerëzor. Mbro familjen tënde! Nuk mundesh ti trimi i lajges të hapësh një lokal dhe aty të vijë dikush të të fusë bombën në xhep dhe ti të shkosh në shtëpi t’ua fusësh prindërve.”
