Një program i ri për përgatitjen e bizneseve shqiptare për tregun europian do të nisë zbatimin këtë vjeshtë.
Ministrja e Ekonomisë dhe Inovacionit, Delina Ibrahimaj, bëri të ditur se për këtë nismë do të vihet në dispozicion një fond prej 250 milionë eurosh, përmes të cilit bizneset do të kenë mundësi të aksesojnë kredi dhe mbështetje financiare.
Sipas saj, programi synon përgatitjen e rreth 48 mijë ndërmarrjeve, duke i ndihmuar ato të përmbushin standardet e tregut europian. Ai do të mbështetet në katër shtylla kryesore dhe do të nisë nga muaji tetor me një proces informimi “derë më derë” për bizneset.
“Është detyra jonë kryesore dhe më e rëndësishme që ne të maksimizojmë sa më shumë fitimet dhe të minimizojmë kostot. Ky program e vendos biznesin në qendër të procesit të integrimit. Investimet e huaja po rriten dhe po drejtohen drejt sektorëve me vlerë të shtuar më të lartë. Paralelisht ne jemi duke marrë një sërë reformash për mbështetjen e biznesit. Kemi zgjeruar aksesin në financa. 250 milionë eurosh për bizneset, që do i lejojë çdo biznesi që të marrë kredi. Ne do të mund të hartojmë një program që do të mund të mbështesë ekonominë. Pasi ne të kemi marrë të gjithë informacionin e duhur mbi gjendjen e biznesit do të nisim me mbështetjen e biznesit. Qëllimi nuk është vetëm që bizneset të respektojnë standardet e BE. Ne duam që të ndërtojmë ekipin “Team Albania”, të cilët do të përmbushin objektivat e programit të bizneset. Një program që do të shkojë në çdo sektor të ekonomisë shqiptare, tha Ibrahimaj.
/vizionplus.tv
