Aurela Gaçe prej më shumë se tre vitesh është e martuar me Skerdin, bashkëshortin e saj me të cilin ka edhe dy vajza, Grace dhe Abigail. Këngëtarja e njohur gjithnjë ndan me fansat eksperiencat, ndjesitë apo momentet nga e kaluara, edhe pse duhet të themi se rrallëherë ndodh që të shprehë dashurinë për të dashurin e saj të zemrës. Mbrëmjen e djeshme, Aurela ka mbledhur fjalët më të bukura për dashurinë dhe ia ka adresuar Skerdit, partnerit që i ka qëndruar gjithnjë pranë dhe e ka mbështetur në çdo hap të jetës. Përmes fjalësh të përzemërta, këngëtarja ka rrëfyer jo vetëm ndjenjat për bashkëshortin, por edhe marrëdhënien e tyre, si dhe krenarinë që ndjen që ka në krah njeriun që i ka falur gjithçka.
“Rrallë e shpreh në publik atë që ndiej për ty. Nuk besoj se të flasësh publikisht tregon se e do më shumë njeriun me të cilin ndan ditët e jetës tënde. Por sot dua të flas. Shumë pak e dinë se çfarë mbështetjeje je ti për mua. Të gjithë më shohin si një njeri të fortë dhe mendojnë se s’kam nevojë për një sup ku të mbështetem. Unë, si çdo artist, kam nevojë për një njeri vizionar, që të shohë e të besojë në atë që je. Do të thotë dikush: “Po ti je vetë”. Mirë, dakord, por askush nuk e di rraskapitjen e mundimin që më është dashur të përballoj e vetme për 20 vjet. Prindërit e dinë mirë çfarë kalon fëmija dhe mundohen me shpirt. Por jo gjithmonë munden nëse nuk janë brenda këtij profesioni. Mund të të ndihmojnë shpirtërisht, sigurisht, dhe mua kjo gjë s’më ka munguar. Por më është dashur të bëj çdo gjë vetë mbas skene, edhe kur s’kuptoja s’i bëhej. Më është dashur të bëhem çdo gjë pas skene: menaxhere, producente (mblidh të ardhura e vetëm harxho në atë që duhet për skenën).
Po, unë e shumë artistë të brezit tim as nuk e dinim se ç’do të thotë menaxhim i aftësive të tua. Unë sot jam më e fortë sepse të kam ty që më sheh në sy e dashuron atë që unë jam. Unë s’kam pasur kurrë nevojë për një burrë që të më mbante me të ardhura, sepse punoja vetë. Unë nuk do të pranoja kurrë të jetoja as 1 orë të jetës sime me dikë që do të më bënte të ndihesha më pak se ajo çfarë besoj se jam. Dhe… unë nuk do të mundesha të bëja çfarë jam duke bërë, të jem “live” në këto përmasa, të luftoj në këtë treg ku “playback”-u të mbyt e unë të arrij të jem në skenë me një staf të vërtetë, të isha “live” çdo javë në skenë në Tiranë, kjo u bë e po bëhet sepse tani i ke marrë ti përsipër gjithë vështirësitë e prapaskenës e mua më jep mundësinë që të mendoj e të jem 100% në skenë, vetëm të jap atë që më fali Zoti. Përveç dashurisë që kam për ty, përveç asaj që më ke bërë të ndiej si qenie njerëzore, unë dua të tregoj se kam në krah njeriun që kupton qenien time në skenë e më ndihmon në çdo hap të realizoj gjëra që në realitetin tonë i besoja të pamundura. Unë sot të falënderoj për gjithçka, o babai i dy vajzave tona mrekulli. Faleminderit Zot për këtë sup ku mbështes kokën!”- shkruan Aurela.
Ndoshta dashuria për këngëtaren shprehet shumë rrallë në publik por kur Aurela flet, thotë gjithçka që një mashkull do të donte të dëgjonte nga njeriu i zemrës.
