MIK festival është aktiviteti kulturor i këtyre ditëve që sjell në Korçë kulturën qytetare dhe atë me vlera kombëtare. Të mërkurën në mbrëmje u çel edhe nata e parë e këtij festivali, ku sopranoja e mirënjohur Inva Mula me organizatorët dhe mbështetësit e aktivitetit dhanë edhe një konferencë shtypi.
Nata e parë e MIK festival, në këtë edicion të dytë ju dedikua motrave Zengo, piktoreve të para femra shqiptare me origjinë nga Dardha. ‘Sot do të interpretojmë jo me ngjyra si mortat Zengo, por me tinguj tanë’ tha Jani Papadhimitri, violinist i njohur dhe djali i piktores Sofia Zengo Papadhimitri. Soprano Inva Mula, bëri me dije se edicioni i sivjetshëm do të ketë dimensione të reja.
Një koncert me muzikë baroke do të jepet edhe në kishën e vjetër të fshatit Shipskë ku shpirti i muzikës do të shpaloset me traditat vendase të kulinarisë. Ndërsa nata e fundit me serenata që mbyll festivalin do të mbështjellë me atmosferën e saj të veçantë pazarin karakteristik të Korçës.
Një nga gjetjet më interesante të këtij edicioni të MIK festival u konsiderua interpretimi i familjes Papadhimitri.
“Korça ka aq figura të njohura në muzikë dhe në kulturë sa të përkujtojë jo vetëm në dy edicione të MIK festival por edhe për shumë vite të tjera’ tha kryebashkiaku I Korçës Sotiraq Filo. Ai dha kështu premtimin se ky aktivitet që është çelur në edicionin e parë me përkujtimin e këngëtares lirike dhe sopranos Tefta Task Koço, e vazhdon me nderimin e motrave Zengo do të shëndrohet në një traditë për të respektuar edhe figura të tjera të shquara të muzikës e kulturës korçare.
MIK festival në këtë edicion të dytë do të zhvillohet nga datat 24 deri 29 korrik, duke sjellë jo vetëm vlerat më të mira muzikore shqiptare, kombëtare dhe ato botërore por edhe ekspozita e aktivitete të tjera që promovojnë turizmin në zonën e Korçës.
