Vazhdon të jetë i lartë fluksi i hyrje-daljeve nga pika e kalimit kufitar të Kapshticës.
Gjatë 24 orëve të fundit nga kjo pikë kufitare kanë lëvizur në të dy anët e kufirit më shumë se 7700 shtetas shqiptarë dhe të huaj.
Fluksi sipas autoriteteve të drejtorisë vendore të Kufirit dhe migracionit në juglindje të vendit thanë se do të jetë i lartë në orët në vijim.
Për të përballuar ngarkesën dhe lëvizjet e shumta të mjeteve të vogla dhe autobuzëve janë shtuar sportelet në hyrje dhe dalje.
Në hyrje bëjnë me dije të njëjtat burime, punohet me katër sportele ndërsa në dalje me tre të tillë. Me shtatë sportele vazhdon të punojë edhe pala greke.
Shtimi i sporteleve nga policia jonë por edhe ajo e vendit fqinj ka ulur në maksimum rradhët e gjata, në kushtet kur temperaturat në juglindje kanë zbritur në disa gradë nën zero.
