Teksa kryemnistri prezantoi objektivat qeverisës për katër vitet e ardhshme, komuniteti i bzinesit e sheh këtë program si një tentativë për të bindur shqiptarët për mandaitn e katërt.
Nikolin Jaka, kryetar i Dhomës së Tregtisë dhe Industrisë Tiranë, i ftuar në “E-ZONE”, thotë se ka një mungesë të theksuar të dialogut mes qeverisë e biznesit, përgjatë tetë viteve të qeverisjes, pasi kërkesat e tyre jo vetëm nuk janë dëgjuar, por mbi të gjitha nismat janë marrë pa një konsultim të sinqertë.
“Qeveria ‘Rama 3’ ka bërë një prezantim të programit për katër vitet e ardhshme, por në fakt ai ngjan më shumë me një tentativë për të bindur shqiptarët për mandatin e katërt. Kjo qeveri duket se kishte të sigurt mandatin e tretë, ndaj shpalosja “Shqipëria 2030” të ngjan me një draft për të fituar mandatin e katërt.”
Sipas Jakës, në program nuk ka një skanim të problemeve të ekonomisë në mënyrë që të përcaktohen prioritet dhe të orientohen politikat, ndaj sektorëve që duhet të udhëheqin rritjen ekonomike.
“Deri më tani kemi parë vetëm nisma sporadike ekonomike, të cilat bëhen pa konsultime me sipërmarrjen, ndaj çdo nismë sporadike dhe e pathelluar në analiza nuk do të ketë efektivitet”, shprehet Jaka.
