Pas paralajmërimeve të presidentit Ilir Meta se qeveria po tenton të bëjë grusht shtetit, ish-ministri i Drejtësisë, Ylli Manjani ka sqaruar tre rrethanat kur mund të bëhet shpërndarja e Kuvendit sipas Kushtetutës.
“ Arsyet e vetme kushtetuese kur shpërndahet Kuvendi:
1.Kur nuk arrin të zgjedhë Presidentin sipas nenit 87 të Kushtetutës.
2. Kur nuk arrin të zgjedhë Kryeministrin, sipas nenit 96.
3. Kur Kryeministri humbet mocionin e besimit, sipas nenit 101.”
Mes të tjerash, Manjani shton se në asnjë kompetencë të shkruar në Kushtetutë nuk përmendet “shpërndarja e Kuvendit si detyrë specifike për Presidentin”.
Nga ana tjetër, Manjani ka dhënë edhe komentin e tij mbi aktualitetin. Sipas tij, Kushtetuta ka rënë dhe është dhunuar aq keq sa “nuk ke më nga ta kapësh për të gjetur kush ka të drejtë e kush jo”.
Rendi Kushtetuese, shprehet Manjani, rivendoset vetëm me proces politik që çon vendin në zgjedhje të lira dhe të ndershme.
“Në vijim duhet shpallur “e shenjtë” Kushtetuta dhe duhet ndërtuar shteti NORMATIV, sipas hierarkisë. I gjithë korpusi ligjor i normave speciale, të veçanta apo të jashtëzakonshme, tipike këto për shoqërinë diktatoriale duhet SHFUQIZUAR dhe duhet ndaluar miratimi i mëtejshëm i tyre.”
