Samiti i G7 ka mbledhur në Kebek të Kanadasë kryeministrat e vendeve më të industrializuara dhe do të vijojë gjatë datave 8 dhe 9 qershor. Kanadaja, Franca, Gjermania, Italia, Japonia, Mbretëria e Bashkuar dhe Shtetet e Bashkuara si dhe Presidenti i Këshillit Evropian, Donald Tusk e Presidenti i Komisionit Evropian, Jean-Claude Juncker do të vendosen në përballjen ndoshta më të vështirë në vite, pasi SHBA ka tronditur raportet me aleatët e saj me fillimin e një lufte të ashpër tregtare.
Sinjalet e para të zemërimit janë parë gjatë kësaj jave. Presidenti francez, Emmanuel Macron do ta trajtojnë me kujdes çështjen e tarifave. Pas bisedimeve me kryeministrin kanadez, Justin Trudeau, ai ka thënë se gjashtë vendet e tjera anëtare janë mjaftueshëm të fuqishme dhe mund të mbijetojnë nëse Shtetet e Bashkuara vendosin të heqin dorë nga roli i tyre global.
Komentet e Macronit reflektojnë tensionet për tregti, të cilat pritet të dominojnë samitin. Vendet anëtare të G7-ës kanë thënë se do të jenë të ashpra me presidentin Trump, ndonëse nuk dëshirojnë përshkallëzim të situatës.
Ekonomia, rritja gjithëpërfshirëse dhe tregtia, Barazia dhe fuqizimi i grave, Siguria dhe politika e jashtme si dhe ndryshimet klimatike dhe oqeanet janë temat kryesore të diskutimit të përzgjedhura nga presidenca kanadeze.
