Çmimi i arit në tregjet ndërkombëtare ka pësuar një rritje të ndjeshme, duke bërë që të ketë një dyfishim të tij në raport me një vit më parë.
Këto ditë tetori të dhënat flasin se çmimi arriti në 4200 dollar për onz.
Elvis Shera, ekspert i investimeve, argumenton arsyet pse ky çmim është rritur ndjeshëm.
“Tre janë faktorët kryesorë pse ari është shtrenjtuar. Kemi një kërkesë të lartë nga bankat qendrore të cilët blejnë ar. Të dhënat flasin se 1/3 e arit që nxirret nga minierat blihet nga bankat qendrore për efekt rezerve. Faktori i dytë që ka rritur çmimin janë fondet e investimeve. Investitorët, sidomos në perëndim, janë bërë më të ndjeshëm në blerjen e arit. Faktori i tretë, një pjesë e popullsisë është bërë më sensitive për zhvillimet politike dhe gjeopolitike duke investuar në ar. Paralelisht pavarësisht kërkesës së lartë, oferta nuk ka ndjekur kërkesën e lartë dhe për rrjedhojë kemi këtë rritje të çmimit”, tha Shera.
Në Shqipëri pak kush e sheh arin si një formë investimi. Shqiptarët janë tradicionalë në format e tyre të investimit, ku dominon depozita bankare.
Por pse shqiptarët e njohin floririn vetëm si bizhu dhe jo si formë investimi?
“Është problematikë e të gjithë perëndimit. Perëndimi e sheh arin si bizhuteri, kështu e ka parë ndër vite. Në botën aziatike ari përdoret si status, si para, si investim. Pra nuk është fenomen vetëm shqiptar, por cilido që ka një interes të tillë mund të informohet në sistemin bankar lidhur me këtë formë investimi”, tha Shera.
Ari lulëzon në një mjedis me norma të ulëta interesi dhe gjatë pasigurive ekonomike. Por çfarë sugjerojnë ekspertët, çfarë duhet të bëjnë qytetarët në kohë të tilla?
“Investimi në ar është një formë investimi për afat të gjatë. Pra nëse doni para në afat të shkurtër, mos investoni në flori. Rruga më e mirë për këtë lloj investimi është ekspozimi në mënyrë periodike. Në kohë të tilla pasigurie rekomandohet që të mbahet një sasi ari në shtëpi, që në rast nevoje ajo konvertohet në para”, tha Shera në Vizon Plus.
