Von der Leyen: BE duhet të përgatitet për më shumë emergjenca

Presidentja e Komisionit Evropian, Ursula von der Leyen, ka paralajmëruar se Bashkimi Evropian duhet të përshtatë sistemet e tij të mbrojtjes civile për t’u përballur me një numër në rritje të emergjencave të rënda dhe të njëkohshme.

Gjatë një deklarate të hënën nga Qendra Evropiane e Reagimit ndaj Emergjencave, von der Leyen tha se Evropa duhet të jetë e përgatitur për një realitet ku ngjarjet ekstreme ndodhin më shpesh, prekin më shumë vende dhe shfaqen në të njëjtën kohë.

Sipas saj, ndryshimet klimatike po e bëjnë motin ekstrem më të paparashikueshëm, ndërsa fatkeqësitë e njëkohshme mund të mbingarkojnë kapacitetet e vendeve individuale dhe të kërkojnë një reagim më të koordinuar evropian.

Presidentja e Komisionit theksoi shkallën e bashkëpunimit ndërmjet vendeve anëtare gjatë sezonit të sivjetshëm të zjarreve. Mekanizmi i Mbrojtjes Civile të BE-së është aktivizuar 10 herë për zjarret pyjore që nga prilli.

Gati 800 zjarrfikës u vendosën paraprakisht në zona me rrezik të lartë, ndërsa ekipe nga 25 vende u angazhuan gjatë verës për të ndihmuar në përballimin e zjarreve.

Situata u përkeqësua pas katër valëve të të nxehtit që goditën Evropën që nga maji, duke rritur rrezikun për zjarre dhe duke ushtruar presion të madh mbi shërbimet kombëtare të emergjencave.