Shtetet e Bashkuara të Amerikës i kërkojnë edhe njëherë politikës shqiptare të bashkëpunojë për zbatimin e shpejtë të reformës në drejtësi, me qëllim pastrimin nga të korruptuarit dhe goditjen e bandave kriminale.
Deklarata vjen nga ambasadori Donald Lu, i cili në një reagim për Zërin e Amerikës, iu përgjigj akuzave për qëndrime të dyfishta lidhur me reformën në drejtësi
“Politikanët shqiptarë duhet t’i japin fund ankesave dhe t’i futen punës. Në vend që politikanët të fajësojnë të huajt, Shtetet e Bashkuara ose Bashkimin Evropian, për problemet që kanë krijuar vetë, do të ishte mirë të kishin dialog politik me njeri tjetrin dhe te punonin bashkë për të zbatuar reformën në drejtësi, përfshi plotësimin me anëtarë të Këshillit të Lartë të Prokurorisë dhe Këshillit të Lartë të Gjyqësorit”.
Diplomati i lartë vëren se palët duhet t’ lënë mënjanë ankesat e të mbështesin prokurorinë për kapjen e kokave të krimit.
“Politikanëve të bashkëpunojnë për të zgjidhur mosmarrëveshjet lidhur me Prokurorin e Përgjithshëm, për mbështetjen e ligjeve të mira dhe për të ofruar burimet që policia dhe prokuroria të kapë kokat e krimit të organizuar”.
Deklarata e ambasadorit amerikan vjen në kohën kur opozita po kundërshton me forcë procesin e ngritjes së këshillit të lartë gjyqësor e të prokurorisë me pretendimin se kandidatët kanë problem ligjore.
