Kryeministri Edi Rama ka folur për mediat nga Tivati i Malit të Zi, ku ndodhet në kuadër të Samitit BE–Ballkani Perëndimor. Ai kërkoi më shumë guxim nga Bashkimi Evropian në raport me procesin e zgjerimit, duke theksuar se Evropa duhet të japë një mesazh më të fortë për vendet aspirante.
Rama solli si shembull procesin e ribashkimit të Gjermanisë, duke kujtuar rolin e ish-kancelarit Helmut Kohl. Sipas tij, BE-ja duhet të ruajë parimin e meritës, por njëkohësisht të tregojë vendosmëri për një qasje të re që afron më shumë vendet e Ballkanit Perëndimor me familjen evropiane.
Rama: Kam kohë që e them këtë, më në fund po dëgjohet por nuk mjafton tani. Besoj që Evropa mbi të gjitha për vetveten duhet të jetë më e guximshme, duhet të ruajnë procesin e bazuar në meritë, por duhet të gjejë këllqet për një moment të ri të llojit Helmut Kohl. Kur muri ra ky njeri i madh nuk i tha gjermano-lindorëve tani keni 35 kapituj për t’i përfunduar përpara se të bëhemi bashkë. Ai tha “ne jemi bashkë dhe pastaj do t’iu ndihmojmë t’i përmbushni”, nëse BE kërkon t’i përçojë botës një mesazh të fortë dhe t’i japë vetes enjergji të mëdha duhet t’i thotë “kështu siç jemi sot rreth tryezës” duhet të jemi gjithmonë rerth kësaj tryeze. Secili me statusin e vet derisa të bëheni anëtarë me të drejta të plota. Ajo çfarë duhet të bëjmë nga ana jonë, është se duhet t’i japim kurajo që të shtyjë përpara dhe u takon atyre pastaj.
Duke komentuar edhe debatin rreth investimit të propozuar në Zvërnec, kreu i qeverisë tha se aktualisht nuk ekziston ende një projekt i miratuar për t’u diskutuar. Ai hodhi poshtë pretendimet që qarkullojnë në rrjetet sociale, duke i cilësuar si narrativa të rreme dhe pjesë e një fushate dezinformuese kundër Shqipërisë.
Sipas Ramës, projekti është ende në fazë paraprake dhe synimi i tij nuk është dëmtimi i mjedisit, por realizimi i një investimi unik, të projektuar nga arkitektë dhe inxhinierë të njohur ndërkombëtarisht, që do të sjellë vlerë për vendin dhe qytetarët shqiptarë.
Rama: Nuk ka kërkesa për të diskutuar sepse nuk ka ende një projekt të miratuar. Së pari duhet të kemi projektin, ta shohim dhe pastaj ta diskutojme. Nuk mund të diskutojmë diçka që nuk ekziston. Por që po paraqitet në të gjithë median sociale në një luftë hibride kundër Shqipërisë me narrative të rreme se ky nuk është projekt por diçka e gatuar mes meje dhe Bibi Netahyanut përmes Jared Kushner për të sjellë palestinezë. Nuk ka një projekt, nuk ka arsye për t’u shqetësuar për aq sa ka të bëjë me projektin dhe edhe sepse arkitektët më të mirë në botë, inxhinierët më të mirë janë angazhuar dhe synimi nuk është që të bëjmë dëm në natyrë por të bëjmë diçka unike që do të jetë një dhuratë e jashtëzakonshme për shqiptarët.
