Ditën e sotme, më 5 qershor, mbahet seanca e radhës në Gjykatën e Posaçme për ish-Presidentin e vendit, Ilir Meta, dhe ish-bashkëshorten e tij, Monika Kryemadhi.
Gjykata e Posaçme ka rrëzuar kërkesën për transmetim live të seancës gjyqësore, duke argumentuar se prania e kamerave nuk parashikohet në legjislacion dhe se proceset gjyqësore nuk duhet të shndërrohen në spektakël mediatik.
Sipas gjykatës, kamerat mund të ndikojnë në cilësinë e shqyrtimit gjyqësor. Në sallë u lejuan vetëm përfaqësuesit e mediave, ndërsa çdo lloj regjistrimi u ndalua dhe seanca nuk u transmetua.
Gjatë seancës, ish-Presidenti Ilir Meta kërkoi rishikimin e vendimit për transmetim live, duke argumentuar se procesi duhet të bëhet publik, në përputhje me Konventën Evropiane dhe standardet ndërkombëtare të medias së pavarur. Ai u shpreh se, sipas tij, raportet e OSBE-së tregojnë një nivel të lartë kontrolli mbi median dhe se nuk kishte arsye që procesi të mos transmetohej drejtpërdrejt.
Meta shtoi se kërkesa e tij për transparencë lidhej me funksionet që ka mbajtur më herët si president dhe kryeministër, ndërsa theksoi se çështja e kushteve në sallën e gjyqit ishte në dorën e gjykatës.
Ilir Meta: Dua t’ju kërkoj ta shikoni edhe një herë çështjen e transmetimit. Ashtu sikurse ne kemi argumentet tona sa i takon konventës europiane të kësaj çështjeje. Por ne i jemi referuar shteteve ku media është e pavarur. Nuk shoh asnjë arsye pse ky proces të mos jepet live. Ju vërtet thoni që e merrni raportimin nga gazetarët e nderuar këtu, por përderisa media është e kontrolluar…
Edhe si president, edhe si kryeministër ua kërkoj.
Përsa i përket çështjes së kafazit nuk më intereson shumë, është në dorën tuaj. Por në ndryshim nga avokati unë nuk e kërkoj për veten time, për shkak të funksioneve që kam mbajtur. Transmetimin e kërkoj për shkak të funksioneve që kam ushtruar, të dytën jo.
