Pas masave të marra nga qeveria për frenimin e përhapjes së koronavirusit, këtë të enjte është mbledhur për herë të parë Kuvendi.
Deputetët, të cilët shihen të shpërndarë në Parlament janë pajisur me doreza, maska kirurgjikale dhe dezinfektantë.
Kreu i Kuvendit Gramoz Ruçi e ka nisur seancën parlamentare duke iu shprehur ngushëllime familjarëve të viktimave të COVID-19.
Gjatë fjalës së tij, Ruçi tha se nga kjo pandemi u nxorën edhe disa mësime, ndërsa theksoi se brenda sistemit shëndetësor duhen bërë përmirësime. Sipas tij, duhen rritur investimet në sistemin e shëndetësisë, përmes vendosjes së një balance.
“Koronavirusi i goditi të gjitha pa dallim dhe fati i fitores nuk varret nga teknologjia dhe pasuria por shpejtësia e masave. Shqipëria është e vogël dhe nuk i imponohet t’i japë mend vendeve të tjera por disa mësime i nxori. Jetës dhe shëndetit duhet t’i përkushtohemi më shumë. Jeta na është dhënë për t’a gëzuar prandaj shëndetësia duhet të jetë prioritet i qeverisë dhe politikës. Qeveria dhe politika duhet të përmirësojnë prioritetet nga zhvillimi ekonomik dhe nga ana tjetër shëndetit të qytetarëve. Brenda sistemit shëndetësor duhen bërë korrigjime. Duhet mbështetje me më shumë investime. Shëndeti publik nuk duhet të jetë aneks i politikave por prioritet. Parandalimi i epidemive duhet të jenë element thelbësor i shëndetit publik. Me parapregatitje efikase”, tha Ruçi.
