Ish-deputeti i LSI, Endrit Braimllari sulmoi qeverinë për paketën “Anti-KÇK”. Sipas tij, kjo nismë është anti-kushtetuese dhe nuk shërben për të luftuar krimin. Braimllari tha se rruga për të goditur bandat është puna me vullnet e qeverisë dhe jo propaganda.
“Paketa Anti-KÇK është një nismë antikushtetuese e cila bëhet në këto momente për të tërhequr vëmendjen nga problemet me të cilat po përballet vendi. LSI vlerëson çdo betejë kundër krimit të organizuar por krimi i organizuar nuk luftohet me propagandë, luftohet me strategji dhe vullnet të qeverisë. Nuk mundet Edi Rama pas 7 vitesh të luftojë krimin e organizuar sepse në këto 7 vite është kryeministri dhe qeveria e tij, që ka fuqizuar krimin e organizuar duke e mbështetur dhe duke i përdorur në fushatë për interesin e tij ashtu siç dolën në përgjimet zyrtare dosja 184 dhe 339.”
Për paketën “Anti-KÇK” reagoi të premten edhe presidenti Ilir Meta, i cili po ashtu doli kundër. Për Metën, krimi nuk luftohet me fushata.
