Ndërsa shtatë udhëheqësit e vendeve më të zhvilluara dhe industrializuara te globit do të takohen këtë fundjavë në Biarritz të Francës, presidenti francez Emmanuel Macron dhe kancelarja gjermane Angela Merkel kanë bërë thirrje që të diskutohet seriozisht djegia e pyjeve të shiut në amazonë.
“Shtëpia jonë është përfshirë nga flakët. Rajoni i Amazonës, mushkëritë e planetit tonë që prodhojnë 20 për qind të oksigjenit janë duke u djegur. Kjo është krizë ndërkombëtare. Anëtarë të G7-ës, le të bisedojmë për këtë urgjencë në dy ditët e ardhshme.”
Në kundërpërgjigje presidenti i brazilit, Jair Bolsonaro u shpreh në tëitter se Macron po përpiqet të përdorë një cështje që I përket Brazilit.
“Deklarata e presidentit francez se çështja e rajonit të Amazonës duhet të diskutohet në samitin e G7-ës, pa pjesëmarrjen e shteteve në rajon, tregon një mentalitet colonialist, I cuditshëm për shekullin e 21”.
Ndërkohë edhe shefi i Kombeve të Bashkuara, Antonio Guterres, ka thënë se është shumë i shqetësuar për zjarret.
“Në mes të krizës globale për klimën, ne nuk mund të përballojmë më shumë dëm në burimin e rëndësishëm të oksigjenit dhe biodiversitetit. Rajoni i Amazonës duhet të ruhet”.
Të dhënat zyrtare tregojnë se gati 73,000 zjarre janë regjistruar në Brazil në tetë muajt e këtij viti, duke shënuar kështu numrin më të lartë qe prej 2013-es. Mbrojtësit e ambientit kanë fajësuar Qeverinë e Brazilit për këtë situatë. Rajoni i Amazonës është një nga zonat kryesore në botë që ndihmon në uljen e ngrohjes globale.
