Bien ndjeshëm hyrjet e emigrantëve shqiptarë nga pikat e kalimit kufitar të qarkut të Korçës. Burime të siguruara pranë Drejtorisë së Kufirit dhe Migracionit në Korçë thanë se gjatë 24 orëve të fundit kanë hyrë në tokën shqiptare vetëm 5 shtetas nga pika e kalimit kufitar të Kapshticës, ndërsa nga dogana e Qafë Thanës nuk është regjistruar asnjë hyrje.
Të pestë këta shtetas pasi kanë plotësuar procedurat e nevojshme kufitare si dhe ato shëndetësore janë dërguar nën mbikqyrjen e policisë në një prej hoteleve që tashmë funksionojnë si karantina për 14 ditë.
Në të katërta hotelet e hapura për këtë qëllim në qarkun e Korçës janë në total 201 shtetas shqiptarë të cilët janë duke qëndruar për 14 ditë pas hyrjes në vendin tonë dhe më pas do të lejohen të shkojnë pranë familjeve të tyre. Tri prej hoteleve ndodhen në qytetin e Korçës dhe një në Pogradec, ndërsa burime të siguruara bëjnë të ditur se autoritetet janë në kërkim edhe të një hoteli tjetër që do të akomodojë shqiptarët që do të vijnë në vazhdim nga Greqia e Maqedonia e Veriut për të plotësuar 14 ditëshin e detyruar të karantinës, si një masë parandaluese kjo për frenimin e përhapjes së koronavirusit në vendin tonë.
