Një konflikt i dhunshëm ka ndodhur pasditen e sotme në fshatin Shkallnur të Durrësit, ku një 36-vjeçar është goditur me sende të forta nga dy persona.
Sipas njoftimit të Policisë, ngjarja është regjistruar rreth orës 15:00, pas një konflikti për motive të dobëta.
Një 36-vjeçar, dyshohet se është goditur me qytën e një pistolete nga një 41 vjeçar, person i shpallur më herët në kërkim, dhe një 27 vjeçar.
Pas ngjarjes, autorët janë larguar me automjet, ndërsa policia ka nisur kontrollet për lokalizimin dhe kapjen e tyre.
“Më datë 24.07.2026, rreth orës 15:00, Salla Operative e DVP Durrës është njoftuar se, në fshatin Shkallnur, gjatë një konflikti për motive të dobëta, shtetasi E. Gj, 36 vjeç, është goditur me sende të forta (qytë pistolete) nga shtetasit D. T., 41 vjeç, person i shpallur më parë në kërkim, dhe G. M., 27 vjeç, të dy banues në Shkallnur, Durrës, të cilët pas ngjarjes janë larguar me automjet.
Gjithashtu, dyshohet se në konflikt ka qenë i përfshirë edhe një punonjës policie, jashtë shërbimit, Inspektor L. Xh., i cili është shoqëruar dhe ndaj tij po kryhen veprimet procedurale nga Agjencia e Mbikëqyrjes Policore (AMP).
Në vendngjarje, grupi hetimor ka gjetur dhe sekuestruar, në cilësinë e provës materiale, një gëzhojë pistolete. Dyshohet se gjatë konfliktit është qëlluar një herë në ajër me armë zjarri pistoletë.
Ndërkohë, forca të shumta të Policisë kanë rrethuar zonën, kanë ngritur pika kontrolli dhe vijojnë kontrollet intensive për lokalizimin dhe kapjen e autorëve.
Grupi hetimor, nën drejtimin e Prokurorisë, vijon veprimet për sqarimin e plotë të rrethanave të ngjarjes dhe dokumentimin ligjor të saj”, njofton policia.
/vizionplus.tv
