Edhe sot, si çdo ditë tjetër, beratasit i sheh të shëtisin në pedonalen e qytetit sikur të ishte një ditë normale. Të shumtë janë njerëzit që i sheh të dalin pa asnjë arsye nga shtëpia dhe të mbipopullojnë më kot rrugët, duke u krijuar vështirësi atyre qytetarëve që janë të detyruar të bëjnë pazar, pagesa faturash apo të shkojnë në farmaci.
Beratasit sot kanë tejmbushur sportelet ku paguhet fatuarat e dritave dhe të ujit,duke krijuar radhë të gjata dhe grupimet njerëzish në këto sportele. Edhe në banka vazhdon po e njëjta gjendje, pasi shumë njerëz shihen të grumbulluar dhe në radhë të gjata për të tërhequr lekë në bankomate apo për të kryer pagasa a tërheqje në sportelet brenda bankës, sa trotuaret bllokohen nga grumbuj qytetarësh të cilët presin për të kryer veprimet në banka.
E njëjta situatë vazhdon dhe në marketet e supermarketet e qytetit, ku deri më tani nuk ka një person që të jetë përgjegjës për mos lejimin e grumbullimit të qytetarëve. Në radhët e gjata dhe grumbullimet në banka e sportele duket se nga ana e qytetarëve nuk ruhet aspak distanca dhe nuk përdoren as masat mbrojtëse, si maska e dorashka. Të vetmit që tregohen më të kujdesshëm janë farmacistët, që nuk lejojnë hyrjen brenda farmacisë për të blerë të më shumë së një qytetari dhe kërkojnë ruajtjen e distancës prej 1 metër nga njëri-tjetri gjatë pritjes së tyre në radhë.
