Të zbulosh një destinacion të ri është një eksperiencë sa argëtuese, aq edhe e vështirë, aq më tepër kur mendon se ç’mund të të kanoset rrugës. Mirëpo, Beatrix dhe Alban Ramosaj nuk e kishin menduar që udhëtimin më të vështirë të jetës së tyre do e kishin pikërisht në Selanik, një qytet evropian i vizituar nga mijëra turistë. Udhëtimi i tyrë i parë në tokën helene jo vetëm që ka rezultuar një nga më të shëmtuarat që kanë përjetuar, por dy këngëtarët kanë rënë gjithashtu pre e burokracisë greke ndaj shqiptarëve.
Vëlla e motër kanë shpërndarë gjatë gjithë kohës momente nga udhëtimi, mirëpo kur kanë arritur në Selanik një gjë e papritur u ka ndodhur: disa persona i kanë thyer xhamin e makinës duke i marrë gjëra me vlerë, përfshirë pasaportat.
“Hera e parë në Greqi dhe na thyen makinën e vodhën pasaportat tona, dokumentet e makinës dhe disa gjëra të tjera. Kemi lajmëruar policinë dhe askush nuk është shfaqur ende. Çfarë duhet të bëjmë? Është çmenduri”, shkruan Beatrixi në një postim në Instastory.
Nuk mungoi as reagimi i Albanit, i cili nga ana tjetër: “Ok, para se të gjykoni që si mund të hedh një gjë të tillë në Instagram, është hera e parë që ndodh diçka e tillë. Na vodhën pasaportat e disa dokumente të tjera. Nuk kemi njeri në këtë qytet dhe policia ka mbi një orë e gjysmë që “është rrugës”. Thua të jetë ngaqë jemi shqiptarë? Thua ta keni bërë se kanë parë targat shqiptare? Apo e bëjnë shpesh këtë gjë këtu? Ç’mikpritje!”. Të dy i shoqëruan shkrimet e tyre me imazhet e makinës, e cila duket qartë se është dëmtuar. Shpresojmë që policia greke të kapë fajtorët./Living
