Ka nisur nata e 11-të e spektaklit “Ferma VIP 3” në ekranin e televizionit kombëtar Vizion Plus.
Nën drejtimin e Vita Production dhe producentes Holta Dulaku, ky format ka arritur të thyejë çdo rekord shikueshmërie në të gjitha trevat shqipfolëse, duke u kthyer në një nga programet më të suksesshme të momentit.
Mbrëmjen e sotme, nën moderimin e Arbana Osmanit dhe me praninë e opinionistëve Ermal Mamaqi, Einxhel Shkira dhe Armina Mevlani, priten emocione të forta, surpriza të papritura dhe vendime të rëndësishme që do të ndikojnë rrjedhën e garës.
Në qendër të spektaklit të sotëm pritet të jetë nominimi i 14 fermerëve ku më pak të preferuarit e publikut do të duhet të përballen në një sfidë. Sipas formulës së këtij formati, humbësit e sfidës do të duhet të kalojnë në një tjetër televotim për eliminim. Një moment ky që gjithmonë ndryshon balancat brenda lojës, dhe sigurisht vendimi i takon vetëm publikut.
Por veç sfidave mbrëmja e sotme ka dhe surpriza të papritura. Hyrje të reja në fermë, do të sjellin një dimension të ri loje, edhe pse një pjesë e fermerëve kanë tashmë mbi një muaj të izoluar.
Paralelisht, zgjedhja e Sarës si kryefermere e ndarja e punëve prej saj ka sjell jo pak tensione dhe pakënaqësi gjatë këtyre ditëve.
Megjithatë pavarësisht debateve ka patur edhe histori dashurie që po zhvillohen brenda fermës. Vanesa dhe Indri tashmë duket se kanë zyrtarizuar marrëdhënien e tyre, e nga ana tjetër Fabiola dhe Adioni pas mesazhit të marrë nga vëllai i fermeres janë disi më të tërhequr nga njëri-tjetri.
Spektakli i sotëm që transmetohet live në Vizion Plus dhe në dy kanalet e dedikuara, premton surpriza, formula të reja dhe sfida emocionuese që do të ndryshojnë edhe një herë balancat në fermë.
