Pesë shoqata biznesi, të bëra bashkë në një deklaratë, shprehen të shqetësuara për klimën e biznesit në vend, ndërsa kanë kërkuar nga qeveria miratimin e një pakete antikorrupsion.
Eksperti i ekonomisë Albert Gajo në një lidhje live për Vizion Plus u shpreh se qeveria nuk ka një synim të qartë për të rregulluar klimën e biznesit në vend, ndërsa shton se rekomandimet e tyre dalin nga 3 apo 4 shqetësime, ndonëse në realitet janë më shumë se kaq.
“Kjo është një thirrje që i bëhet komunitetit të biznesit. Është një thirrje e biznesit që shikojnë se klimat e tyre po përkeqësohet. Qeveria nuk ka një synim të qartë si do përmirësohet klima e biznesit. Ato sugjerojnë një bashkërendim të politikave e platformave të hapura me grupet e interesit.
Janë rekomandime që dalin nga 3-4 shqetësime kryeore, por jemi koshientë që nuk janë vetëm kaq, por më shumë”, tha Gajo.
Eksperti shtoi më tej se bizneset hartojnë një plan për 2-3 vitet e ardhshme, ndërsa, ndërsa ndryshimi i shpeshtë i politikave dhe në mënyrë jo transparente “përmbys” parashikimet e tyre.
“Ka një lloj angazhimi të qeverisë për diskutime me grupet e interesit, por ato kanë qenë të ngushta. Ndryshimet e taksave duhet të bëhen në mënyrë transparente. Janë edhe problemet që ne kemi shtruar më herët, krijimin e monopoleve.
Çdo biznes ka një plan për 2-3 vitet e ardhshme. Nëse atë e bazon mbi një platformë taksash dhe këto ndryshojnë çdo 6 muaj apo 1 vit, çdo plan i biznesit do ndryshonte. Kjo transparencë në Shqipëri ka munguar. Duhet të ketë siç janë edhe jashtë dialog me grupet e interesit apo shoqëritë civile”, tha Gajo.