Një tjetër rast mashtrimi, ku dyshohet se është i përfshirë Florian Gjergji, është denoncuar në Durrës. Sipas informacioneve paraprake, i riu nga Shkodra, i cili dyshohet se ndodhet në Gjermani, ka arritur të mashtrojë një kambist duke i zhvatur 60 mijë euro.
Burime bëjnë me dije se Gjergji i është prezantuar kambistit përmes mesazheve si kushëriri i një biznesmeni të njohur, me të cilin kambisti kishte miqësi. Duke shfrytëzuar këtë lidhje besimi, ai i ka kërkuar shumën prej 60 mijë eurosh dhe e ka orientuar që paratë t’ia dorëzonte një personi pranë një qendre tregtare.
Pas marrjes së shumës, personi i ngarkuar për të tërhequr paratë është larguar drejt Elbasanit, ku është takuar me një tjetër person që kishte mbërritur me taksi nga një fshat i zonës. Sipas hetimeve paraprake, paratë i janë dorëzuar këtij të fundit, i cili më pas është larguar.
Policia ka arritur të identifikojë dhe të ndalojë dy personat e përfshirë në Elbasan. Në dëshmitë e tyre, ata kanë deklaruar se ishin kontaktuar dhe udhëzuar nga Florian Gjergji.
Rasti u zbulua pas denoncimit të vetë kambistit. Ky i fundit, pasi kishte dorëzuar shumën e kërkuar, kontaktoi mikun e tij për ta njoftuar se kishte përmbushur porosinë. Në atë moment ka mësuar se biznesmeni nuk kishte kërkuar asnjë shumë parash, duke kuptuar se kishte rënë pre e një mashtrimi.
