Ish-gjyqtari Guzim Zenelaj është shpallur fajtor nga GJKKO. Zenelaj akuzohet për veprën penale “Refuzimi për deklarim, mosdeklarimi, fshehja ose deklarimi i rremë i pasurive, interesave private të personave të zgjedhur dhe nëpunësve publikë ose i çdo personi tjetër që ka detyrimin ligjor për deklarim”.
Lidhur me akuzat që rendojnë ndaj tij, GJKKO vendosi dënimin e tij me 6 (gjashtë) muaj burgim.
Lexo edhe :
Por, bazuar në nenin 59 të Kodit Penal, GJKKO ka urdhëruar pezullimin e ekzekutimit të vendimit me burgim për të pandehurin Guxim Zenelaj, duke u detyruar që të mbajë kontakte me zyrën vendore të Shërbimit të Provës Tiranë.
Përfundimisht GJKKO vendosi ish-gjyqtarin në provë për një periudhë kohe prej 1(një) vit, me kusht që gjatë kohës së provës të mos kryejë vepër tjetër penale.
Gjatë kohës së provës, i pandehuri detyrohet t’i përgjigjet thirrjeve dhe kërkesave të Zyrës Vendore të Shërbimit të Provës Tiranë, të marrë pëlqimin në Zyrën Vendore të Shërbimit të Provës Tiranë për ndryshimin e vendbanimit.
Edhe shpenzimet e kryera në fazën e hetimit paraprak, në shumën 220,000 (dyqind e njëzet mijë) lekë dhe shpenzimet gjyqësore, sipas formularit bashkangjitur i ngarkohen të pandehurit
Kundër vendimit lejohet ankim nga palët në Gjykatën e Posaçme të Apelit për Korrupsionin dhe Krimin e Organizuar./vizionplus.tv
