Dhjetë vite pas miratimit të reformës në drejtësi, duket se ka ardhur momenti që qeverisja e sistemit të drejtësisë të nisë të japë llogari për arritjet dhe dështimet. Politikani që në emër të PS udhëhoqi reformën në drejtësi, Fatmir Xhafaj nuk i kurseu kritikat ndaj Këshillit të Lartë të Prokurorisë i cili raportoi sot në Komisionin për Mbikqyrjen Institucionale.
“Se të gjithë thonë qeveria, qeveria! Por askush nuk I kërkon llogari qeverisë suaj. Por shqiptarët nuk kanë pse i kërkojnë llogari asaj qeverisë që është këtej për cështjen e stokut, për cështjen e cilësisë së hetimit, për cështjen e shkeljes së të drejtave të njeriut. Jeni ju qeveria, nuk janë ata”, tha Fatmir Xhafaj, kryetar i Komisionit për Mbiqkyrjen Institucionale.
Xhafaj deklaroi se Këshilli i Lartë i Prokurorisë është një prej hallkave më të dobëta të sistemit.
“Në vlerësimin tim Këshilli I lartë I prokurorisë mbetet ndoshta një prej institucioneve më të dobëta të sistemit të drejtësisë aktualisht në shqipëri. Për shkak të faktit që shumë cështje që lidhen sot me sistemin e prokurorisë gjenerojnë nga vendimarrjet e vonuara, nga vendimarrje të diskuttueshme”, shtoi Xhafaj.
Xhafaj replikoi me kryetaren e KLP, e cila theksoi se problemi më i madh në sistem janë vakancat e krijua si pasojë e shkarkimeve nga procesi i vetingut.
“Kjo është një situatë që ju e keni ditur se Kushtetuta dhe ligji kanë qenë aty. Keni qenë të paaftë të bëni llogaritje të kësaj natyre, apo ka një lloj papërgjegjshmërie ndaj këtij problemi, përsa kohë që ju gjatë vitit të kaluar i keni kërkuar Shkollës së Magjistraturës vetëm 12 kandidatura. Kur ju kishit të gjithë mundësitë të kërkoni 20, 24, 30 nga Shkolla e Magjistraturës, ndërkohë që keni 100 e ca vakanca”, tha Xhafaj.
“Ne kemi pasur debate të forta për numrin e magjistratëve. Unë përsonalisht kam propozuar numrin maksimal të vakancave por kjo qasje nuk u vlerësua nga këshilli në shumicën e anëtarëve të tij”, tha Mirela Bogdani, kryetare e KLP.
Reforma në drejtësi u miratua në 22 korrikun e vitit 2016 me 140 vota pro. Për shkak të procesit të vetingut i cili largoi nga sistemi një pjesë të prokurorëve dhe gjyqtarëve; të gjitha institucionet e sistemit të drejtësisë janë ankuar në parlament për vakancat në sistem, të cilat kanë ndikuar në rritjen e numrit të dosjeve që mbeten pa u shqyrtuar dhe kohën e gjatë që iu duhet qytetarëve të marrin drejtësi.
