Dy persona janë arrestuar në Romë nga Karabinierët e Njësisë Speciale Operative (ROS), të akuzuar për spiunazh dhe akses të paligjshëm në sisteme informatike.
Sipas autoriteteve italiane, informacionet e ndjeshme dyshohet se i janë kaluar një agjenti të shërbimeve sekrete ruse, i cili gëzonte imunitet diplomatik në Itali.
I dyshuari kryesor është një 59-vjeçar, ish-anëtar i shërbimeve italiane të inteligjencës dhe ish-nënoficer i Karabinierëve. Hetuesit dyshojnë se ai siguronte informacione të klasifikuara në këmbim të parave.
Sipas hetimeve, ai i merrte të dhënat përmes gjashtë burimeve, mes të cilave katër ushtarakë në detyrë. Ata janë gjithashtu nën hetim, së bashku me një person tjetër, duke e çuar në shtatë numrin total të personave të përfshirë në dosje.
Prokuroria Ushtarake dhe Prokuroria e Romës po hetojnë çështjen për vepra penale që përfshijnë sigurimin e informacioneve që lidhen me sigurinë e shtetit, spiunazh politik ose ushtarak, zbulim të sekreteve shtetërore dhe publikim të informacioneve, shpërndarja e të cilave është e ndaluar me ligj.
Ministri italian i Mbrojtjes, Guido Crosetto, falënderoi prokurorët dhe hetuesit për punën e tyre, duke theksuar se nuk do të ketë asnjë tolerancë ndaj kujtdo që rrezikon sigurinë kombëtare.
“Nuk mund të ketë asnjë tolerancë, aq më tepër kur janë të përfshirë persona me funksione përgjegjëse, ndaj kujtdo që komprometon ose vë në rrezik sigurinë e Republikës. Mbrojtja e sigurisë kombëtare, e informacioneve të klasifikuara dhe e institucioneve është një interes parësor i shtetit dhe nuk pranon asnjë lëshim”, deklaroi Crosetto.
Ai bëri të ditur se Ministria e Mbrojtjes do të bashkëpunojë plotësisht me autoritetet gjyqësore dhe do të ndërmarrë çdo masë të nevojshme për të garantuar integritetin e strukturave të saj dhe për të forcuar besimin e qytetarëve te institucionet.
Hetimi ka nisur në maj të vitit 2025 nga ROS-i i Karabinierëve dhe ka sjellë hapjen e dy procedimeve penale, një pranë Prokurorisë së Romës dhe një tjetër pranë Prokurorisë Ushtarake. Gjatë hetimeve janë kryer përgjime, vëzhgime, ndjekje, kontrolle dhe ekspertiza informatike, ndërsa arrestimet u realizuan me mbështetjen e Njësisë Speciale të Ndërhyrjes dhe Komandës Provinciale të Karabinierëve në Romë.
