Presidenti i SHBA, Donald Trump ka sulmuar sërish aleatët e tij duke thënë se ata i kthyen shpinën në luftën që ndërmori kundër Iranit.
Nga Ankaraja, ku do të marrë pjesë në samitin e NATO-s, dhe ku zhvilloi një takim dypalësh me presidentin turk Rexhep Tajip Erdogan, Trump deklaroi:
“Nuk kemi nevojë për ndihmë pasi të mbarojë lufta. Epo, nuk kemi nevojë për ndihmë në përgjithësi, në thelb. Ne i ndihmojmë ata, por nuk jemi të sigurt nëse do të na ndihmojnë. Gjermania, Franca dhe Britania e Madhe na kanë kthyer shpinën për Iranin, Italia na ka kthyer shpinën.
Dhe kjo është në rregull, kjo është në rregull. Por e dini, pse po shpenzojmë qindra mijëra dollarë dhe ata nuk janë aty për ne, na kthejnë shpinën, bëjnë sikur nuk na shohin? Kjo është ajo që bënë.”, u shpreh ai.
Duke u ndalur te Ukraina, ai theksoi se pret së shpejti përparim drejt negociatave për t’i dhënë fund luftës së Rusisë.
“Dje pata një bisedë të gjatë me Putinin. Menjëherë pas kësaj, fola me Zelenskyn. Mendoj se të dy duan një marrëveshje; është për të ardhur keq që u desh kaq shumë kohë. Por mendoj se diçka do të dalë prej saj.”
Një koment bëri edhe për Groenlandën, teksa tha se ajo do të kontrollohet nga SHBA, dhe jo nga Danimarka.
“Ishte Groenlanda ajo që, sipas mendimit tim dhe vazhdon të jetë që duhet të kontrollohet nga Shtetet e Bashkuara, jo nga Danimarka. Dhe kur ata nuk do të pajtoheshin me këtë, dhe me të gjitha paratë që shpenzojmë për t’i ndihmuar ata me Rusinë, dhe nuk kemi nevojë të shpenzojmë asnjë para, ne mund t’i largojmë të gjithë ushtarët tanë nga Evropa, sepse, siç ndoshta e keni vënë re, Evropa është një vend shumë i ndryshëm nga sa ishte 20 vjet më parë, shumë i ndryshëm, shumë i ndryshëm, shumë i ndryshëm, dhe ata më mirë të jenë të kujdesshëm me imigracionin dhe energjinë. Nëse ata nuk janë të kujdesshëm me këto dy gjëra, nuk do të keni më një Evropë.”, u shpreh Trump.
