Prokuroria pranë Gjykatës së Shkallës së Parë të Juridiksionit të Përgjithshëm në Korçë ka çuar për gjykim dy zyrtarë të Bashkisë Korçë, të akuzuar për veprën penale të “Shpërdorimit të detyrës”, parashikuar nga neni 248 i Kodit Penal.
Të pandehur në këtë çështje janë Zh. B. dhe E. Gj., të cilët në periudha të ndryshme kanë ushtruar funksionet e Drejtoreshës së Urbanistikës dhe Përgjegjësit të Sektorit të Kontrollit dhe Zhvillimit të Territorit.
Nga hetimet e procedimit penal nr.1061 të vitit 2022, ka rezultuar se këta zyrtarë kanë favorizuar në mënyrë të paligjshme të paktën 20 subjekte ndërtuese, duke u aplikuar taksa shumë më të ulëta nga sa përcakton ligji.
Në thelb të skemës abuzive qëndron ulja e taksës së ndikimit në infrastrukturë, nga norma standarde 8% në vetëm 3%, në 18 raste, dhe në dy raste të tjera nga 4% në 3%, duke shkaktuar një dëm ekonomik të konsiderueshëm për Bashkinë Korçë.
Një ndër rastet më flagrante është ai i ndërtimit të një kompleksi me katër pallate në lagjen nr.3 të qytetit, ku është miratuar ndërtimi si kompleks turistik, ndonëse ai ka shërbyer për banim dhe njësi shërbimi. Në këtë rast, përmes uljes së taksës, bashkia ka humbur rreth 36 mijë euro.
Hetimet zbuluan gjithashtu se zyrtarët kanë miratuar certifikata përdorimi për objekte që në praktikë rezultonin të ishin shitur si apartamente banimi, duke fshehur qëllimin tregtar të ndërtimit. Gjithashtu, është konstatuar firmosja e raporteve të rreme, mosrespektimi i kompetencave për kontrollin e ndërtimit dhe shpërdorimi i funksionit publik.
Prokuroria thekson se veprimet e dy zyrtarëve kanë kontribuar në shmangien e taksave dhe abuzimin me ligjin, në dëm të interesit publik dhe të të ardhurave vendore, duke cenuar ndjeshëm integritetin institucional të Bashkisë Korçë.
Procesi tashmë i kalon gjykatës, ndërsa rasti konsiderohet një shembull shqetësues i korrupsionit të nivelit lokal, që vjen në një kohë kur lufta ndaj abuzimeve me ndërtimet është shpallur prioritet nga institucionet ligjzbatuese.
