Një operacion i gjerë ndërkombëtar antidrogë, rezultat i një hetimi të përbashkët mes Prokurorisë Antimafia të Barit dhe Prokurorisë së Posaçme në Shqipëri, ka zbuluar rrjetin e një grupi kriminal të përfshirë në trafikun e lëndëve narkotike nga Shqipëria drejt Italisë dhe më tej në disa vende të Bashkimit Evropian dhe Amerikën e Jugut.
Gjatë këtij hetimi janë dokumentuar dhjetëra episode trafiku dhe pastrimi parash, janë sekuestruar miliona euro dhe janë lëshuar masa sigurie për 52 persona në të dyja vendet.
Autoritetet italiane dhe shqiptare konfirmojnë se ky operacion ka arritur të godasë një strukturë të sofistikuar kriminale me shtrirje ndërkombëtare.
Prokurori Vladimir Mara ka dhënë detaje nga operacioni “Ura”. Në një konferencë për mediat, ai bëri me dije se janë administruar të dhënat e Sky Ecc dhe nga analizmimi i këtyre të dhënave është arritur të rindërtohet dhe dokumentohet gjithë shtrirja e aktivitetit kriminal.
Gjithashtu janë dokumentuar 30 episode të qarkullimit të parave nga Italia në Shqipëri, në një vlerë prej gati 5 milionë euro.
Prokurori Mara: Ka qenë një hetim i përbashkët mes Prokurorisë Antimafia të Barit dhe Prokurorisë së Posaçme. Në kuadër të këtij hetimimi, janë kryer hetime paralele në Shqipëri dhe Itali, janë shkëmbyer të dhëna në mënyrë të menjëhershme dhe është realizuar seksuestrimi në disa episode i lëndëve narkotike në shtetin italian. Nga Drejtoria Antimafia dhe Prokuroria e Barit janë administruar të dhënat e Sky Ecc. Nga analizmimi i këtyre të dhënave kemi arritur të rindërtojmë dhe të dokumentojmë gjithë shtrirjen e aktivitetit kriminal, i cili fillonte në Shqipëri, fillimisht drejt Puglias dhe më pas në gjithë territorin evropian e në vijim në disa vende të BE si Gjermani, Belgjikë, Holandë dhe Amerikë e Jugut.
Janë sekuestruar lëndë narkotike në 30 episode në Itali dhe në 10 episode në Shqipëri, në Holandë dhe në disa vende të tjera të BE. Është dokumentuar i gjithë cikli i lëvizjes së lëndëve narkotike. Së dyti falë analizës së kryer nga hetuesit e Drejtorisë së DIA-s, është arritur të konkludohet lidhur me të gjitha të ardhurat nga ky aktivitet kriminal. Janë dokumentuar 30 episode të qarkullimit të parave nga Italia në Shqipëri, në një vlerë prej gati 5 milionë euro. Janë ekzekutuar masat e sigurisë për 52 persona, në Shqipëri dhe Itali. Gjatë këtij hetimi, më parë janë sekuestruar 3 milionë euro, para CASH, si të ardhura të këtij grupi kriminal./vizionplus.tv
