Një 52-vjeçar humbi jetën tragjikisht në Shkodër, si pasojë e një zjarri që përfshiu banesën e familjes Çotaj në fshatin Zogaj.
Viktima Jakup Çotaj ndodhej në gjumë së bashku me bashkëshorten, kur u shfaqën flakët.
Lexo edhe :
Related Posts
Ishte kryefamiljarja ajo që i vuri re zjarrin dhe shpejtoi të dalë jashtë, ndërsa bashkëshorti megjithë thirrjet e saj dhe fqinjit që i erdhi në ndihmë, nuk arriti të dalë.
Riza Mollaku tregon momentin e përballjes me flakët në familjen e fqinjit të tij. Ai tregon se janë dashur plot 40 minuta që të mbërrijë zjarrfikësja për të shuar flakët. Çdo gjë ka qenë e kotë pasi bashkë me shkrumbimin e banesës, u dogj edhe kryefamiljari 52-vjeçar.
“Ka dalë e shoqja jashtë për të kërkuar ndihmë, se vetëm unë jam komshi. Duke thirrur e duke bërtitur “hajde se u dogj burri”. E kanë gjetur atje te dera. Kam marrë djalin dhe gruan, jam futur deri në katin e parë te shkallët duke i thirrur. Hyra në kat të dytë, më ka dalë tymi dhe flaka përballë. Erdhi djali me shokun më pas, janë ngjitur deri lart dhe rrezikuan të mbeteshin atje nga tymi. Zbritëm poshtë, mora zorrën, u mundova ta fik. Lajmëroi djali zjarrfikësen, i ka dalë Malësia e Madhe, i ka thënë “ne s’kemi punë me atë punë”. I tha “po digjet shtëpia me njerëz brenda”. Mori policinë, policia i tha “lajmëro zjarrfikëset”. Ka marrë sërish zjarrfikëset e Shkodrës, ata janë vonuar 40 minuta. Erdhën 4 zjarrfikëse, deri në orën 08:00 kanë ndenjur këtu, derisa nxorën kufomën . Ai ishte gjallë e shëndoshë, ne nuk arritëm të bënim atë që duhej”, thotë fqinji.
Grupi hetimor nën drejtimin e Prokurorit po punon për përcaktimin e shkakut të rënies së zjarrit.
Dy janë pistat ku po hetohet, ajo e një shkëndije elektrike, si dhe pakujdesia me hedhjen e ndonjë cigareje.
